شوفتوا الغباوة بعينها

شوفتوا الغباوة بعينها

Tuesday, October 24, 2006

محدش يقولي عيد مبارك

كفاية حرام حتي العيد كمان هوه ابن الانبوبة ده ماسابشي حاجه غير وبقت باسمه
محطات باسمه ,مطارات باسمه,كباري باسمه,انفاق باسمه,قري ومدن كامله باسمه,مصر كلها بقت باسمه
حتي العيد اللي بنستناه مره في السنه بقي باسمه "عيد مبارك"( ياليله سوده كرهنا في العيد كمان...الحمد لله ان انا مش باسمه) كنت ولعت في نفسي
انا خايف علي ميدان رمسيس بعد اما فضي يخلوه ميدان مبارك ماهي ناقصه, حتي النوادي اغلبها علي اسمه
وكل واحد ييجي يبني حاجه يسميها علي اسم الملك عشان ينوبه م الحب جانب(كله بيركب الموجه...صحيح بلد مع...ولا بلاش عشان لفظ مش حلو) وكله تمام سعادتك وبناءا علي توجيهات معاليك

واحد صاحبي معرفهوش قالي "عيد مبارك" قولتله ماتقوليش "عيد مبارك" قولي عيد سعيد عيد مش سعيد المهم اي حاجه غير مبارك
قاللي ماتخافش السنه دي اخر سنه هقولك فيها "عيد مبارك" وانا مذهول قلتله هوه خلاص هيغور (الله شعر جميل) قاللي انت اتجننت لا طبعا بس السنه دي "عيد مبارك " والسنه الجايه "عيد جمال "وبعد 25سنه هيبقي "عيد شادي جمال"

يلا بقي مش عايزين نكد في العيد وكفايه لحد كده
وكل سنه واحنا طيبين وعيد مبا..... لأ عيد سعيد
واكيد سعيد ده هيبقي ارحم من مبارك
وعجبي

Wednesday, October 18, 2006

الي متي .....هذا هوالسؤال

من كام يوم كده وانا قاعد مع صاحبي الانتيم شوفنا 2رجالة و3 ستات ماشين مع بعض وزي ما يكونوا بيتخانقوا مع بعض وشكلهم ناس غلابةاوي اوي اوي
فقالي:ها ياعم انت مش عايز تصلح البلد روح شفهم كده بيشدوا مع بعض ليه وايه اللي بيفكروا فيه وايه اللي عايزينه...يابني البلد دي لا هتتعدل ولا حاجة وهتفضل زي ماهيه طول ما الناس بتفكر كده
قولتله:طبيعي طول ما الفساد موجود في كل حته حواليك عمرنا ما هنتقدم بس لو الحال اتغيراكيد هنبقي احسن واحسن
قالي:طب هوه الحال هيتغير ازاي وهنبقي احسن منين طول ما الناس زي ما انت شايف كده افكارهم تافهه وسلبيين
قولتله:هما نجحوا وبجداره انهم يخلوك تايه احيانا وتافه اوقات كتير...لما تفتح التليفزيون وتلاقي برامج تافهه وكلها سطحية وتجيب عقم كمان ولا في برنامج ديني ولا اي حاجة عدلة وبقوا يلهوك في ماتشات الكورة و الكليب الجديد لفلانه وتتفرج علي برنامج تلاقي جوز بقريجيلك تخلف وانت بتتفرج عليهم قاعدين عمالين يتكلوا ع النيو لوك والتسريحة الجديدة والفستان ابو ترتر...ولما تيجي نازل من بيتكوا شايل هم المواصلات والزحمة وهتتاخر ع المحاضرة والدكتوريسالك سؤال سخيف مالوش اجابة (اية اللي اخرك ؟؟!!!) طبيعي مايبقاش في مجال للتفكير في اي حاجة تانية ويبقي المواطن المصري عامل زي الطور في الساقية ...ده غير انهم خلوا حياتك مليانة بالمشاكل واللامبالاه
قالي:وانت ازي هتصلح ده كله ده اللي انت قولته كفايه انه يجيب احباط لعيل عنده 10سنين
قولتله:لازم النظام كله يتغير من اول الملك لغاية اصغر واحد في الحاشية
قالي:ده زي ما اتغير في النتخابات اللي فاتت مش كده...وخليتنا ننتخب واحد طلع ديكتاتور وضرب النار علي اعضاء حزبه واقتحمه بالقوة
قولتله:انا ما انتخبتش نعمان جمعه حبا فيه بس برنامج الوفد كان احسن برنامج فعلا
قالي:طب ما احنا كده كده عارفين ان البعيد ناجح ناجح حتي لو بالتزوير
قولتله:بالزمة انت مش مكسوف وانت بتقول كده
قالي: واتكسف من ايه ماهي حاجة معروفة للناس كلها وعشان كده محدش راح ينتخب
قولتله:لحد امتي هنفضل بالتفكير ده...لما المثقفين والمتعلمين بيقولوا كده امال الجهله يقولوا ايه...يعني ايه هوه كده كده ناجح امال الشعب فين والناس فين ولغاية امتي هنفضل كده...وبعدين انا معاك كلنا عارفين ان البعيد كان هينجح يعني هينجح بس بدل ما ينجح ب88,5% ينجح ب60 %او70% علي الاقل يحس بخطروان الناس بدات تفوق م الغيبوبة وتصحي م النوم ومستحيل تتزور لو خد40% ويخلوها 88,5% بس احنا اللي ساعدناهم واديناهم الفرصة انهم يلعبوا بينا والملك وحاشيته خلاص مفيش حد بقي هاممهم م البلد بلدهم واللي عايزينه بيكون يرفعوا اسعارويفبركوا الدستور علي مزاجهم ماهي بقت عزبة اللي خلفوهم تقعد تسمع واحد من الحاشية تحس انه بيكلم بهايم مش بني ادمين واكنهم ملايكه واحنا اللي شياطين وولاد كلب
قالي :ماهيه دي الحقيقة..وعشان توصل لازم تركب الموجة وتروح معاها مكان ماتوديك هيه دي الموجة الكسبانة
قولتله:لأ وانا مش هركب الموجة مهما حصل
قالي:يبقي عمرك ما هتعمل حاجة وهتفضل زي ما انت لان ده الطريق الوحيد اللي نهايته سعيده
قولتله: بالعكس...ده طريق نهايته سد ..كان خلد فيها حد؟؟ او ماطلعش بخساير؟؟؟
ولحد امتي هنفضل كده غيرنا هوه اللي بيتحكم فينا ومش قادرين نقوله لأ


فعلا...الي متي سنظل هكذا...خراف صامته بقيادة ذئب جائع ؟؟؟
هذا هو السؤال

Sunday, October 08, 2006

نووي...يا نووي.....وانا نفسي العب بالنووي

كلنا سمعنا وشوفنا وقرينا ان الملك وحاشيته اخيرا صحيوا وقالوا هننتج طاقة نووية
طب ليه؟.....طب ازاي؟.....طب اشمعني دلوقتي؟.....طب هنجيب ال3مليار دولارمنين؟-التكلفة-وازاي؟
كل الاسئلة جت في بالي انا وكتير مننا وبعدين هو احنا نقدر نعمله لوحدنا.
اكيد كلنا فرحنا اول ماسمعنا الخبر وانا اول واحد وقولت 100 100
اهه الواحد هيشتغل ويبقي لينا قيمة-علي اعتبار اني فيزيائي-بس اقعدت افكر في اجابة الاسئلة دي
وملقيتش غير اجابات محددة ومعتقدش ان في غيرها
  1. بعد ما الغولة غلبت مع ايران ومش لاقيالها حل لازم يبقي في توازن قوي في الشرق الاوسط زي ما اسيا فيها الهند وباكستان مثلا ومفيش في المنطقة بلد تقدر تبقي ند لايران غير مصر..... وده من وجهة نظر الغولة
  2. ان اشقاءنا العرب وخصوصا الخليج مرعوبين من المارد الايراني اللي بدا يكبر وبصورة مخيفة بالنسبة ليهم ونفوذه اللي عماله تزيد في العراق ولبنان والشعبية الجارفة اللي في الشعوب العربية تجاهه فلازم يبقي فيه ند قوي قصاد المارد ده
  3. طيب ليه هما ما يعملوش الموضوع ده عندهم؟؟؟ لانهم يخافو علي نفسهم من اي تسريب او تلوث ينتج عن المحطة ومعندهمش الخبرة اللازمة لحاجة زي دي وهما اللي يمولوه ومش خسرانين حاجة اهي مصر ام الدنيا وبلد الحضارة والريادة والكلام اللي بيضحكوا علينا بيه واحنا فرحانين بيه مووووووووت
  4. في زيارتها الاخيرة لمصر تنت "انا كوندا" قالت ان الغولة مستعدة لتمويل المحطة ومساعدتنا في انتاج الطاقة النووية السلمية............................والله من يومهم وهما بيحبو الخير للناس كلها...ربنا يكرمهم وبكده يبقوا مشيو اول خطوة في طريق الشرق الاوسط الجديد
  5. الملك: اهي حاجة تعرف عبيدنا اننا بنشتغل لمصلحة المملكة وقلبنا عليهم وتشغلهم عن التعديلات الدستورية اللي هنفبركها في الدورة اللي جاية
  6. جيمي النووي(ولي عهد المملكة) قال: احنا من زمان بنفكر في بديل عن مصادر الطاقة الاخري عشان اسعارها غالية وهتاخد وقتها وتخلص.....اه يا بن ال..........................انبوبة
  7. لو هما همهم ع البلد واسعار البترول والغاز والحاجات دي ماكانوش اصلا غلوا البنزين.....ده احنا اصلا دولة منتجة للبترول اومال المغرب اللي معندهاش ولا نقطة تعمل اية(عارفين عملت اية اعلنوا من كام يوم كدة انهم رخصوا سعر البترول نظرا لانخفاض سعرة العالمي) لا تعليق اه ياولاد ال.....................أنبوبة

والله انا اول ماشوفت جيمي النووي وهوه بيعلن عن انتاجنا للطاقة النووية في مؤتمر الحزب الوثني اللا ديمقراطي فرحت جدا جدا جدا والناس كلها فرحت بيه بس للاسف تاتي الرياح بما لا تشتهي السفن

و اول اما عرفت اللي وراه قرفت جدا جدا جدا وقولت هو الواحد متوقع اية غير كده

ياريت كلنا نفوق م الغيبوبة اللي حطونا فيها ونعرف اللي بيجري في البلد من ورانا