شوفتوا الغباوة بعينها

شوفتوا الغباوة بعينها

Friday, September 07, 2007

متشكرين أوي يا حكومة

ايوه .................... 1000 شكر يا حكومه وكتر خيرك كمان ع اللي عملتيه
ايوه طبعا لازم أشكر الحكومة بعد اللي هي عملته....................طب وهي عملت ايه بقي ؟
أصل انا الحمد لله اكتشفت ان الحكومه بتسمع كلامي وبتتابع مدونتي كمان
انا قبل كده كنت كتبت موضوع عن الخمور والحشيش واستغربت ليه ان الخمور مسموح ومصرح بها والحشيش لأ
وكنت كمان بطلب ان المفروض يكونوا الاتنين ممنوعين ويبقي عليهم عقوبات مشدده
و الحمد لله أخيرا الحكومه استجابت لطلبي
بس بدل م تمنع الخمور..........لأ دي عملت العكس وصرحت بالحشيش بس هما مش عايزين يقولوا عشان ماتحصلش مظاهرات في البلد
مع اني واثق ان الشعب خلاص بقي عنده لامبالاه وان لو حصلت (ده لو حصلت يعني) مظاهرات هتبقي مظاهرات تأييد للقرار
المهم.....انا كنت في اسكندرية من اسبوعين كده وكنت ماشي ع البحر في المعمورة انا وابن خالتي واتنين صحابه
واحنا ماشيين لاقيت واحد كده فجأة طلع من وسط الشاليهات (وانا كنت اقرب واحد له) وبيسألني : مش عايزين بني يا بهوات؟؟
أنا الصراحه مكدبش عليكوا مفهمتش هو عايز ايه وناديت علي أحمد ابن خالتي قلتله تعالي شوفه عايز ايه
هو سأل أحمد نفس السؤال ولقيت أحمد بيقوله لأ متشكرين معانا.....أنا استغرب هو ايه اللي متشكرين وايه البني اللي معانا ده
سألت أحمد : هو كان عايز ايه ؟........قالي : كان بيسألنا ان كنا عايزين حشيش !!!!!؟؟
سألته وانا هتجنن من الاندهاش م اللي حصل ومن جرأه الواد كمان : هو البني ده قصده به الحشيش؟؟....وهو انت ماشي ومعاك حشيش؟؟
قالي : لأ بس أنت لو ماقلتلوش كده مش هيسيبك الا اما تشتري منه
قلتله : طيب وهو الموضوع ده بقي عادي كده ؟؟.......قالي : يووووه ومن زمان كمان
مش قلتلكوا الحشيش بقي مسموح به
كنا الاول بنشوف علي محلات البقاله والسوبر ماركت يافطه هنا تباع كروت ميناتل
بس من بكره وانت نازل من بيتكوا بص علي نفس المحلات هتلاقيهم معلقين يافطه هنا يباع أجود أنواع الحشيش.....وماتستغربش!!!!!
بكره الحشيش هيتباع زي اللبان واللب في المقلة......وماتستغربش!!!!!
ياتري امتي بقي هنحس علي دمنا ونعرف احنا رايحين فين وفين مصلحتنا وقبل ده كله لازم نرجع لدينا ونعمل الحلال ومانعملش الحرام
شوفتوا بقي احنا وصلنا لايه ؟؟
هي دي مصر يا عجوة..........وعجبي

Thursday, June 07, 2007

ضع العنوان المناسب...!!؟؟

هذه المقاله قرأتها للأستاذ خيري رمضان في عموده بجريده المصري اليوم بتاريخ 31\5\2007
وكانت بعنوان "نداء الي رئيس الجمهورية" وهذا نصها

سيدي الرئيس...
أعرف أن سيادتكم تتلقي يوميا مئات الاستغاثات والنداءات والرجاءات من كل فئات الشعب.. وهذا يعني كما تعلمون أن الشعب لم يعد يثق في مؤسسات الدولة، وأن هذه المؤسسات لم يعد يعنيها الشعب أو الجهات الرقابية عليها.. لذلك فإني ألجأ إليكم.
هل شاهدت سيدي الرئيس ما حدث في جلسة محاكمة فساد البترول، المتهم فيها عضو مجلس الشعب عماد الجلدة وآخرون؟.. هل شاهدت الحضور يهتفون لك وباسمك في بداية الجلسة، ثم انقلبوا عليك وهتفوا ضدك بعد الحكم، وهم يحاولون الاعتداء علي هيئة المحكمة، ويحطمون مقاعد القاعة؟.. لم يكن المشهد غريبا علينا وعليكم، فقد سبق تكراره كثيرا في الشهور الأخيرة.
سقطت هيبة القضاء عمدا، بعد أن سعي رجالك إلي هذا.. قسموا رجال القضاء إلي فرق، لأهداف سياسية، وجعلوهم هدفا للنقد المتدني، وأصبح الهجوم عليهم شيئا عاديا، حتي يمرروا ما شاءوا من قوانين، فتعرضوا للحصار والضرب والمحاكمات العلنية.
سقطت هيبة القضاء، وسقطت معها وقبلها وبعدها قيم ورموز ومؤسسات وأسماء.. أهين أساتذة الجامعة وأصبحوا فريقين، واحداً منهم مع النظام والآخر ضده، وياويل من هو ضد النظام!.
سيدي الرئيس.. يدعي رجالك وهم يثيرون الفتن، ويحرضون علي لغة متدنية، يهينون الرموز، ويحطمون كل قيمة في المجتمع، أن «الرئيس شخصيا يتعرض للنقد والهجوم».. ولكنهم لم يعترفوا بأنهم السبب في ذلك، بعدما انتشر الفساد في البر والبحر والجو، فزاد الفقراء، وتدني حال الطبقة المتوسطة، وأهدرت قيمة المثقفين، وأغلقت الأبواب في وجه الجميع، فلم يعد أمام الناس إلا رأس النظام.
سيدي.. نحن نرفض التطاول علي مقامكم الرفيع، ونستاء من التجاوز في الخطاب الموجه إليكم.. ولكن فاض الكيل، وأصابنا الفزع وكل شيء ينفلت من حولنا، لم تعد هناك قيمة نلتف حولها، سُلط القضاة علي القضاة، والصحفيون علي الصحفيين، والنواب في مجلس الشعب علي النواب،
فأصبح الفاسد شريفا، والشريف مهانا مقهوراً.. أتوا بأعضاء لحزبكم، أخبارهم في المحاكم أكثر من نشاطهم في دوائرهم.. وأتوا بحكومة عائلية تملك اقتصاد البلد الذي تديره، وتصارعوا علي كعكة مصر، حتي كادوا يلتهمونها والشعب جائع، خائف، غريب.
سيدي الرئيس.. تجرأ الجميع علي مؤسسات الدولة بما فيها رمز الأمن، ولم يعد أمام الشعب حوائط صد مؤسساتية تمنع التجاوز والغضب في الوصول إلي سيادتكم.. إنها بدايات الانفلات التي تهدد كل شيء، وأنا أخشي علي أبنائي من هذا الانفلات، أريد كمواطن أن أطمئن علي مستقبلهم الغائم، وهذا الانفلات يهدد كل شيء.
أناشد سيادتكم أن تلتفت لنا قليلا، وتبحث كيف تعيد للمواطن احترامه وأمانه، فحماية كرامة رئيس الجمهورية تبدأ من حماية كرامة المواطن.. والمواطن في بلدنا مهان ومسحوق ومسروق ومضروب، فأعد إليه حقوقه، حتي يبقي الوطن، وتبقي مهابا محفوظا!!.

*********************

أستاذي العزيز\...خيري رمضان
أكن لك كل تقدير واحترام واتابع مقالاتك باستمرار وردودك في باب بريد الجمعه بجريده الاهرام, أختلف معك احيانا وأتفق معك أحيانا.
ولكن أسمح لي هذه المره أن أقوم أنا بدورك في بريد الجمعه وأقوم بالرد علي ما جاء في مقالكم.
أنت قلت أن رجاله هم من يثيرون الفتن وأنهم سبب ما وصلنا اليه...اذن فمن الذي أتي بهؤلاء الرجال الي أرفع المناصب وأعطاهم الضوء الأخضر لفعل كل شئ وكان البلد فجأه تحولت الي عزبه يفعلوا فيها ما يشاءوا ؟؟؟
من الذي عين هذه الحكومه التي قلت عنها أنت أنها عائليه وأنها تمتلك أقتصاد البلد الذي تديره و انهم تصارعوا علي كعكه مصر ؟؟؟..........أليس هو من قام بكل ذلك ؟؟ أليس هو من قام بتعيين هؤلاء الرجال في تلك المناصب..ومن غيره قام بتشكيل تلك الحكومه ؟؟ أليس هو المتحكم والمسيطر علي كل شئ في هذه البلد ؟؟؟
فكيف اذن بعد كل هذا ان نطلب منه هو نفسه أن يلتفت الي المواطن ويحميه ويرعي مصالحه...ألا تتفق معي في أن هذا النداء غير منطقي ؟؟؟
كيف لنا أن نطلب من عتريس في فيلم شئ من الخوف أن يأمر رجاله بالكف عن أذي أهل القريه...أليس عتريس هو قائدهم وهو من يأتمرون بأمره وهو المستفيد مما يفعله رجاله باهل هذه البلده ؟؟؟
والغريب سيدي...أن بعد كل ما قلته أنت يخرج علينا المنافقون من الحاشيه "وما أكثرهم في هذه الأيام" ويقولون أنه كعادته تدخل في الوقت المناسب وانقذ حياه هذا...وتتدخل أيضا ليصلح تلك المشكله...وتتدخل كذلك ليرعي مصالح هؤلاء " أفلح ان صدق "
ألم أقل لك أنه هو من يتحكم ويسيطر في كل أمور هذه البلاد !!!
وفي النهايه لك جزيل الشكر والاحترام.
=========================
رد الملك
ده شعر جاني في ايميل
أكن اللي كتبه قري النداء بتاع الاستاذ خيري وبعته علي انه رد الملك علي هذا النداء
وطبعا انا مش هحرمكم من قرايه الشعر ده
واليكم رد الملك
ياشعبي حبيبي ياروحي يابيبي ... ياحاطك في جيبي يابن الحلال
ياشعبي ياشاطر ياجابر خواطر ... ياساكن مقابر وصابر وعال
ياواكل سمومك يابايع هدومك ... ياحامل همومك وشايل جبال
ياشعبي اللي نايم وسارح وهايم ... وفي الفقر عايم وحاله ده حال
احبك محشش مفرفش مطنش ... ودايخ مدروخ واخر انسطال
احبك مكبر دماغك مخدر ... ممشي امورك كده باتكال
واحب اللي ينصب واحب اللي يكدب ... واحب اللي ينهب ويسرق تلال
واحب اللي شايف وعارف وخايف ... وبالع لسانه وكاتم ماقال
واحب اللي قافل عيونه المغفل ... واحب البهايم واحب البغال
واحب اللي راضي واحب اللي فاضي ... واحب اللي عايز يربي العيال
واحب اللي يائس واحب اللي بائس ... واحب اللي محبط وشايف محال
واحبك تسافر وتبعد تهاجر ... وتبعت فلوسك دولار او ريال
واحبك تطبل تهلل تهبل ... عشان مطش كوره وفيلم ومقال
واحبك تأيد تعضض تمجد ... توافق تنافق وتلحس نعال
تحضر نشادر تجمع كوادر ... تلمع تقمع تظبط مجال
لكن لو تفكر تخطط تقرر ... تشغلي مخك وتفتح جدال
وتبدأ تشاكل وتعمل مشاكل ... وتنكش مسائل وتسأل سؤال
وعايز تنور وعايز تطور ... وتعمللي روحك مفرد رجال
ساعتها حجيبك لايمكن اسيبك ... وراح تبقى عبره وتصبح مثال
حبهدل جنابك واذل اللي جابك ... وحيكون عذابك ده فوق الاحتمال
وامرمط سعادتك واهزأ سيادتك ... واخلي كرامتك في حالة هزال
وتلبس قضيه وتصبح رزيه ... وباقي حياتك تعيش في انعزال
حتقبل ححبك حترفض حلبك ... حتطلع حتنزل حجيبلك جمااااال
ايه رأيكم
مش هو ده الرد المنطقي للملك ؟؟؟
ومعتقدش انه هو لو رد هيرد يقول غير كده

Thursday, May 17, 2007

مـــاذا تـعـلّـمـــت...؟؟؟؟

مـــاذا تـعـلّـمـــت ؟؟؟؟

تعلمت انه لايهم اين انت الان
ولكن المهم الى اين تتجه فى هذه اللحظة
***
تعلمت انه خير للانسان ان يكون كالسلحفاة في الطريق الصحيح ... على ان يكون غزالا فى الطريق الخطأ
***
تعلمت ألا أنظر خلفي ... حتي لا أسقط علي وجهي
***
تعلمت ان مفتاح الفشل هو محاولة ارضاء كل شخص تعرفه
***
تعلمت أن لا خير في القول إلاّ مع العمل ... و لا في الفقه إلاّ مع الورع
ولا في الصدقة إلا مع النية ... و لا في المال إلاّ مع الزكاة
و لا في الصدق إلا مع إنجاز الوعد
***
تعلمت انه خير للانسان ان يندم على مافعل ... من ان يتحسر على ما لم يفعل
***
تعلمت ان العمل الجيد افضل بكثير من الكلام الجيد
***
تعلمت ان الناس ينسون السرعة التي
انجزت بها عملك ... ويتذكرون نوعية ما انجزته
***
تعلمت انه يوجد كثير يحصلون على النصيحة
القليلون فقط يستفيدون منها ..
***
تعلمت ان المتسلق الجيد يركز على هدفه ولا ينظر الى الاسفل ... حيث المخاطر التي تشتت الذهن
***
ثم مـــاذا تـعـلّـمـــت ؟؟؟؟

تعلمت ان فشل التجربـة لا يعتبر أسوأ مافي الحياة
انما الفشل هو ان لا نجرب
***
تعلمت انه فى المدرسة او الجامعة نتعلم الدروس ثم نواجه الامتحانات
أما في الحياة فاننا نواجه الامتحانات وبعدها نتعلم الدروس
***
تعلمت ان محادثة بسيطة او حوار قصير مع انسان حكيم تساوى شهر من دراسة
***
تعلمت أن الحكمه تخرج من أفواه المجانين ..... أحيانا
***
تعلمت ان هناك اناس يسبحون فى اتجاه السفينة ... وهناك اناس يضيعون وقتهم بانتظارها
***
تعلمت انه لا ينتهى المرء عندما يخسر ... انما عندما ينسحب
***
تعلمت ان الذى يكسب في النهاية ... من لديه القدرة على التحمل والصبر
***
تعلمت انه من أكثر الاسلحة الفعالة التى يملكها الانسان... هي الوقت والصبر
***
تعلمت انه يجب على الانسان ان يحلم بالنجوم ... ولكن فى نفس الوقت يجب الا ينسى قدميه على الارض
***
تعلمت انه عندما تضحك ...يضحك لك العالم
وعندما تبكي ... تبكي وحدك
***
تعلمت ان هناك فرق كبير بين التراجع ... والهروب
***
تعلمت ان الشجرة المثمرة ... هي ما يهاجمها الناس
***
تعلمت انه من اجمل الاحاسيس هو الشعور من داخلك بانك قمت بالعمل الصحيح.. حتى لو عاداك العالم أجمع
***
تعلمت انه اذا لم يجد الانسان شىء يموت من اجله ... فإنه فى اغلب الظن لن يجد شيئا يعيش من أجله
***
تعلمت ان كل مانراه عظيما فى الحياة بدأ بفكرة ومن بداية صغيرة
***
وأخيراً .. تعلمت ان الابتسامة لا تكلّف شيئا ...ولكنها تعني الكثير
وأنت ماذا تعلمت ؟؟؟

Thursday, May 03, 2007

الحياة المديدة للملك

الحياة المديدة للملك
ده اسم المسرحية اللي عملتها الكليه واللي انا حضرتها من 3 اسابيع تقريبا
ولقيت ان اسمها هو احسن عنوان للموضوع ده.......................ليه؟؟
اصل بكره وعقبالكوا كلكوا....." عيد ميلاد الملك رقم 79 " يااااااااه ربنا ما يطولناش في عمره
وطبعا انا مش محتاج افكركوا به لانه مايتنسيش اصلا..وحتي لو احنا نسيناه الحاشية طبعا مش هتنساه
لأنه - وكالعاده - هنلاقي الجرايد الحكومية " القومية سابقا " هتفرد الصفحه الاولي في صوره واحده ست
مكتوب عليها بالبنط العريض مصر وهي شايله جلاله الملك وجرنال تاني يبقي راسم مصر واحده ست ومكان قلبها
حاطيين صورته ومكتوب عليها عبارات من امثال " ادامك الله زخرا لمصر , وانت في قلب مصر و.......حد يقولي ايه معني زخرا"!!1
طبعا كله كوم واللي هيعمله تليفزيون الرياده كوم تاني...لانه كالعاده برضه وزي كل سنه
هنلاقي فيلم عنتر بن شداد بيتعرض الصبح وفيلم الناصر صلاح الدين بيتعرض بالليل...قال يعني......الحدق يفهم!!1
ده غير برقيات التهنئه من الحاشيه والمنافقين.
وطبعا ما تنسوش ان بكره برضه هيبقي حفل زفاف ولي عهد المملكه...ربنا يرزقه بعيل ويبقي يمسكه امانه السياسات وولايه العهد
وطبعا ده بعد عمر طويل وحياة مديده لجلالة الملك
وكل اما اقعد افكر واقول هو الراجل ده هيتكل امتي .. اتذكر قول المولي تبارك وتعالي في سوره الحج_الايه5
"وَمِنكُم مَّن يُتَوَفَّى وَمِنكُم مَّن يُرَدُّ إِلَى أَرْذَلِ الْعُمُرِ لِكَيْلَا يَعْلَمَ مِن بَعْدِ عِلْمٍ شَيْئاً " صدق الله العظيم
يللا ادعوله ربنا يهديه ويهدينا ويرحمنا جميعا
وكل سنه وانت مش طيب
والسنه الجايه مانحتفلش به وتكون انت عند ربنا وياخد حقنا منك

Saturday, April 21, 2007

حد عنده اجابه.....ويشارك في مسابقتنا










من أسبوع تقريبا وانا نازل الصبح رايح قصر العيني قابلت اسلام واحمد وحازم وعلاء وكان معاهم العربية وخارجين
سالوني رايح فين قلتلهم رايح قصر العيني قالولي خلاص تعالي معانا وننزلك في سكتنا واحنا رايحين الجامعة ( كلهم في جامعه القاهرة ماعدا حازم في مودرن اكاديمي ) وسالتة وانت يا حازم مش رايح الجامعة؟؟ قالي لأ انا ماليش نفس اروح ورايح مع احمد جامعته
المهم ركبت معاهم
اسلام كان سايق وانا قاعد جنبه واحمد وحازم وعلاء قعدوا ورا
بعد اما مشينا شوية كده لقيت احمد قام جايب كوباية من تحت الكرسي ومطلع من جيبه خابور حشيش (قرش كابتشينو.....سيم اهه عشان محدش يفهم) والاقيه هو وحازم قاعدين بيضربوا في العربية وفي وسط الشارع ولا هاممهم حاجه واستغربت جدا لاني اول مره اشوف حازم وهو بيعمل كده لكن احمد عادي طول عمره مسطول اللي يضحك ان احمد كان هيعدي ع المحكمة الاول قبل مايروح الكلية وفعلا راح المحكمة وهو مسطوووووول ودخل للقاضي وهو عامل دماغ
المهم...نزلت انا ورحت مشواري بس وانا راجع بقي قعدت افتكر الموقف ده وجه علي بالي سؤال غريب جدا وهو ده السؤال اللي بسببه بكتب الموضوع ونفسي حد يقولي اجابه مقنعه

ليه لو في ناس قاعدين بيشربوا خمور اوبيرة او...الخ محدش يقدر يكلمهم , في حين لو كانوا قاعدين بيشربوا حشيش او مخدرات او...بيتقبض عليهم !!؟؟

وفضلت افكر في الموضوع وادور علي اي اجابة بس مالقيتش
واقول لنفسي الخمرة والبيرة حرام...بس برضه الحشيش والبانجو حرام
الخمرة والبيرة بيسطلوا ويذهبوا العقل...بس برضه الحشيش والبانجو بيسطلوا ويذهبوا العقل
طيب في ايه بقي اشمعني ده ممنوع (قانونا) ... وده مسموح به ومصرح واحيانا الحكومة هي اللي بتستورده ؟؟
وفضلت في حيرتي كده وانا مش لاقي اجابة وقلت خلاص انا لازم اخلي ناس تشاركني في حيرتي
سالت ناس كتير جدا ..الغالبية منهم قالولي مش عارفين..وناس قالولي تصدق اول مرة ناخد بالنا م الموضوع ده وقالولي لو عرفت اجابة للسؤال ده لازم ابقي اقولها ليهم

بس اطرف اجابه لقيتها لما سالت واحد من اصحابي قالي : اصل البيرة بتغسل الكليه وطبعا عشان حكومتنا قلبها ع المواطن وصحته منعت الحشيش وسمحت بالبيرة............ (كلام كبير اوي )؟
وللا لما سالت حازم (مش حازم انا..ده اعز اصحابي وعندي في البيت بيقولوا عليه انه خطيبتي مع اني عايز اخطب واحده شبه غاده عادل ...بس امري لله كله قسمه ونصيب ) قالي يابني الكلام ده كان زمان لكن دلوقتي الحشيش بيتوزع مع العيش وبقي موجود اكتر من اللب وادينا كنا بنشرب واحنا في العربية وعدينا من قدام القسم وعلي اكتر من لجنه بس ولا حد كلمنا ولا حد قالنا انتوا بتعملوا ايه ..يابني احمد دخل قابل القاضي وهو مسطول في اكتر من كده مسخره...شكلهم كده وافقوا علي تجارته بعد اما وافقوا ع التعديلات الدستورية؟؟

اما راي حازم المتواضع ( ده بقي حازم انا ) وعلي اعتبار اني راجل بتاع فيزيا ف انا اري ان الحكومة المصرية قامت ببعض الابحاث عن ثقب الاوزون ووجدت ان السبب في هذا الخرم هو دخان الحشيش المتصاعد بكثره في يوم الحشيش العالمي ( الوقفه سابقا ) اللي بتكون فيه مصر كلها خربااااااااااااااااااااااااااااااااااااااااااااانه

ونظرا لحرص الحكومة المصرية علي البحث العلمي وصحه الناس في كل انحاء الدنيا فقد ارتئت الحكومة تجريم البيع والاتجار في الحشيش والسماح ببيع الخمور والبيرة .............لأنها بتغسل الكلي

ولكن يظل هذا السؤال بلا اجابة مقنعه
ياريت تشاركوا معانا في مسابقتنا عشان تكسبوا جوايزنا القيمه
اتصل الان علي زيرو تعديلات دستورية زيرو وزارة الداخلية...اتصل لتربح احدي الجوائز التالية
الجايزة التالتة : امر بالاعتقال لمده لا تزيد عن خمس سنوات ولا تقل عن ثلاث سنوات
الجايزة التانية : امر بالاعتقال لمده لا تقل عن عشر سنوات مع التعذيب (انت واللي جابوك لحد اما يبانلك صاحب) بس ممكن تزيد عن 10 في حاله الاجابة النموذجية
اما جايزتنا الكبري : فهي ارسالك في بعثه علميه - تضم نخبه من اكبرالعلماء المعارضين للنظام - الي الشمس لقياس درجه حرارتها والعوده الي المحروسه واطلاعنا علي نتائج ابحاثكم في هذا المجال.....(ده لو رجعت اصلا وحتي لورجعت هما مش هيسيبوك)..فخليك هناك ارحم
كل ماتتصل اكتر فرصتك في الفوز تكتر.....اتصل الان

Saturday, March 31, 2007

تستاهلوا كل اللي يجرالكوا

أنا مش عارف اقول ايه
بقي معقول اللي بيحصل في بلدنا ده, بقي معقول 7 مليون هما اللي يقرروا مصير اكتر من 70 مليون بني ادم
وفين باقي ال 35 مليون - المقيدون بالجداول الانتخابيه - راحوا فين وكانوا فين يوم الاستفتاء (نسيت انهم مش فاضيين وبيجروا ورا اكل عيشهم) هو احنا يا جماعه بيتجدد لنا دستور كل يوم ولما ما نروحش نشارك في حاجه هتغير لنا حياتنا اللي جايه اومال هنشارك في ايه؟؟. حد يجاوبني
واحد بيقولي تبقي مجنون لو مصدق ان ال 9 مليون اللي اعلنوا عنهم دول راحوا فعلا يابني ده اللي راحوا هما ال 2 مليون اللي رفضوا
وال 7 مليون دول هما اللي زوروهم عشان يمرروا التعديلات
والله لو ده فعلا حصل دي تبقي كارثه, لما 2 مليون بس هما اللي يروحوا والباقيين نايمين في العسل يبقي الشعب ده يستاهل كل اللي يجراله
ويستاهل يمشي في الشارع وعساكر الامن المركزي تضربه بالجزم مش بالعصيان. ويبقي حد يشتكي بقي من الاسعار
والمواصلات وكرامه المواطن والحريه والديمقراطيه والفول والطعميه
ولا واحد تاني يقولي انا ما روحتش عشان كنت بقاطع عشان ما نديش الشرعيه للاسفتاء, اقوله اتنيل عليك وعلي اللي جابك اديك قاطعت حد عبرك ولا حد قال ان الاستفتاء ماكنش شرعي, بالعكس ده انت بمقاطعتك دي اديتهم الفرصه انهم يلعبوا زي ما هم عايزين ويغيروا في النتايج بمزاجهم
لكن لو كان كل ال 35 مليون بني ادم راحوا وشاركوا في الاستفتاء كان يستحيل انهم يغيروا في حاجه
ومحدش يتحفني ويقولي يعني هما مش هيقدروا يغيروا في النتيجه ويقولوا ان اللي وافقوا اكتر من اللي رفضوا
لأن ده مش ممكن يحصل لو الناس كلها كانت اتنيلت وراحت رفضت التعديلات
وبعدين انهي اسهل لما يبقي قدامي 35 بطاقه كلهم فاضيين واكتب فيهم اللي انا عايزه , وللا لما يبقي كلهم مرفوضين ده حتي اللي بيزور هيخاف يعمل حاجه
نفرض مثلا ان في عربجي بيضرب كل الحمير اللي عنده (70 مليون حمار) ومش بياكلهم ولا بيهتم بيهم ومبهدلهم اخر بهدله (بيعاملهم اكنهم مصريين) قامت الحميرعشان تاخد حقها اعترضت وثارت في وشه
طبعا العربجي هيحرم يضربهم بعد كده وهيعمل كل اللي هما يقولوا عليه
ياريتنا نبقي زي الحمير وننهق ولو لمره واحده قبل ما نموت
اتحرك يا أبو الهول ........... كفايه كده

Wednesday, March 07, 2007

أحلي سلام للتعديلات التمام..."اهو كلام والسلام"



أنهت اللجنة الدستورية والتشريعية بمجلس الشعب الموافقة على 18 مادةً من 34 هي المواد الدستورية المطروحة للتعديل، وقد رفض نواب الأغلبية إدخال أي تعديل على صياغة اللجنة التشريعة التي لم تغير في الصياغة التي قدمها رئيس الجمهورية في خطابه، وجاء ذلك بعد انفرادهم باللجنة بعد انسحاب نواب الإخوان والمستقلين وبقاء عددٍ محدود من نواب المعارضة والمستقلين.



المادة 1: جمهورية مصر العربية نظامها ديمقراطي يقوم على أساس المواطنة والشعب المصري جزءٌ من الأمة العربية ويعمل على تحقيق وحدتها الشاملة


.المادة 4: يقوم الاقتصاد الوطني على حرية النشاط الاقتصادي والعدالة الاجتماعية وكفالة الأشكال المختلفة للملكية والحفاظ على حقوق العمال


المادة 5: إضافة فقرة إلى المادة نصَّت على الآتي: للمواطنين حق تكوين الأحزاب السياسية وفقًا للقانون ولا تجوز مباشرة أي نشاطٍ سياسي أو قيام أحزاب سياسية على أية مرجعية دينية أو أساس الدين أو بناءُ على التفرقة بين الجنس والأصل. (تم إضافة كلمة مرجعية قبل الدين)


المادة 12: يلتزم المجتمع برعاية الأخلاق وحمايتها، والتمكين للتقاليد المصرية الأصيلة، وعليه مراعاة المستوى الرفيع للتربية الدينية والقيم الخلقية والوطنية، والتراث التاريخي للشعب، والحقائق العلمية، والآداب العامة، وذلك في حدود القانون، وتلتزم الدولة باتباع هذه المبادئ والتمكين لها


المادة 24: ترعى الدولة الإنتاج الوطني، وتعمل على تحقيق التنمية الاقتصادية والاجتماعية


المادة 30: الملكية العامة هي ملكية الشعب، وتتمثل في ملكية الدولة والأشخاص الاعتبارية العامة (حذف من هذه المادة كل شيء عن القطاع العام)


المادة 33: للملكية العامة حرمة، وحمايتها ودعمها واجب على كل مواطن وفقًا للقانون


المادة 37: يعين القانون الحد الأقصى للملكية الزراعية بما يضمن حماية الفلاح والعامل الزراعي من الاستغلال


المادة 56: ينظم القانون مساهمة النقابات والاتحادات في تنفيذ الخطط والبرامج الاجتماعية وفي رفع مستوى الكفاية بين أعضائها وحماية أموالها


المادة 59: حماية البيئة واجب وطني وينظم القانون الحق في البيئة الصالحة والتدابير اللازمة للحفاظ عليها


المادة 62: للمواطن الحق في الانتخاب وإبداء الرأي في الاستفتاء وفقًا لأحكام القانون والمساهمة في الحياة العامة واجب وطني، وينظم القانون حق الترشيح لمجلسي الشعب والشوري وفقًا للنظام الانتخابي الذي يحدده بما يكفل تمثيل الأحزاب السياسية ويتيح تمثيل المرأة في المجلسين، ويجوز أن يأخذ القانون بنظامٍ يجمع بين النظام الفردي والقوائم الحزبية بأية نسبة بينهما يحددها، كما يجوز أن يضمن حدًّا أدنى لمشاركة المرأة في المجلسين

وعندما اعترض النواب على كلمة "يجوز" قال سرور إن انتخابات الشورى على الأبواب وستكون الانتخابات باطلة إن لم تُوضع كلمة يجوز في النص؛ لأنها ستجرى وفقًا للنظام الحالي القائم على الفردي


المادة 73: رئيس الدولة هو رئيس الجمهورية، ويسهر على تأكيد سيادة الشعب وعلى احترام الدستور وسيادة القانون وحماية الوحدة الوطنية، ويرعى الحدود بين السلطات لضمان تأدية دورها في العمل الوطني


المادة 74: لرئيس الجمهورية إذا قام خطر يهدد الوحدة الوطنية أو سلامة الوطن أو يعوق مؤسسات الدولة عن أداء دورها الدستوري أن يتخذ الإجراءات السريعة لمواجهة هذا الخطر، بعد أخذ رأي رئيس مجلس الوزراء ورئيسَيْ مجلسي الشعب والشوري، ويوجه بيانًا إلى الشعب، ويجري الاستفتاء على ما اتخذه من إجراءاتٍ خلال ستين يومًا من اتخاذها، ولا يجوز حل مجلس الشعب أثناء ممارسة هذه السلطات


المادة 76: للأحزاب السياسية التي مضى على تأسيسها 5 أعوام متصلة على الأقل قبل إعلان فتح باب الترشيح واستمرت طوال هذه المدة في ممارسة نشاطها مع حصول أعضائها في آخر انتخابات على نسبة 3% على الأقل (كانت النسبة 5% قبل التعديل) من مجموع المقاعد المنتخبة في مجلسي الشعب والشوري أو ما يساوي هذا المجموع أحد أعضاء المجلسين في أن ترشح لرئاسة الجمهورية أحد أعضاء هيئتها العليا وفقًا لنظامها الأساسي متى مضت على عضويته في هذه الهيئة سنة متصلة على الأقل، واستثناءً من حكم الفقرة السابقة يجوز للأحزاب السياسية المشار إليها التي حصل أعضاؤها بالانتخاب على مقعدٍ على الأقل في أي من مجلسي الشعب والشوري في آخر انتخابات أن ترشح في أي انتخابات رئاسية تجري خلال 10 سنوات اعتبارًا من أول مايو 2007م أحد أعضاء هيئته العليا وفقًا لنظامه الأساسي متى مضت في عضويته في هذه الهيئة سنة على الأقل


المادة 82: إذا وقع مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية أو رئيس مجلس الوزراء عند عدم وجود نائب لرئيس الجمهورية أو تعذَّر نيابته عنه، ولا يجوز لمَن ينوب عن رئيس الجمهورية طلب تعديل الدستور أو إقالة الحكومة أو حل مجلسي الشعب والشوري


المادة 84: في حالة خلو منصب رئيس الجمهورية أو عجزه الدائم عن العمل يتولى الرئاسة مؤقتًا رئيس مجلس الشعب، وإذا كان المجلس منحلاً حلَّ محله رئيس المحكمة الدستورية العليا، وذلك بشرط ألا يرشح أيهما للرئاسة، مع التقيد بالفقرة الثانية من المادة 82


المادة 85: إضافة فقرة على المادة تنص على الآتي: ويقف رئيس الجمهورية عن عمله بمجرد صدور قرار الاتهام، ويتولى نائب رئيس الجمهورية أو رئيس مجلس الوزراء عند عدم وجود نائب رئيس الجمهورية الرئاسة مؤقتًا لحين الفصل في الاتهام، مع التقييد بالفقرة الثانية من المادة 82


المادة 88: يحدد القانون الشروط الواجب توافرها في أعضاء مجلس الشعب، ويبين أحكام الانتخاب والاستفتاء، على أن يتم الاقتراع في يوم واحد، وتتولي هيئة عليا تتمتع بالاستقلال والحيدة الإشراف على الانتخابات على النحو الذي ينظمه القانون ويبين القانون اختصاصات اللجنة وطريقة تشكيلها وضمانات أعضائها على أن يكون من بين أعضائها أعضاء من هيئات قضائية حالين وسابقين، وتشكل اللجان العامة التي تشرف على الانتخابات على مستوى الدوائر الانتخابية واللجان التي تباشر إجراءات الاقتراع والفرز على أن تشكل اللجان العامة من أعضاء من هيئات قضائية؛ وذلك كله وفقًا للقواعد والإجراءات التي يحددها القانون


ف ش فضيلة وشرف

هه هه هلس في هلس

وعجبي.............


فوقوا بقي حرام عليكوا

Sunday, February 18, 2007

والله العظيم هيموت..وانتوا كمان هتموتوا.....اصلها مابتدومش لحد


خلاص النفاق بقي عاده عندنا وبقي طبيعي وصفه من صفاتنا الاساسيه
بقي طبيعي جدا اننا نشوف واحد يطلع في اي مؤتمر من مؤتمرات الملك ويهتفله بهتافات
كان اخرها " يا مبارك مش كفاية ... احنا وراك للنهاية " بس
ياتري النهايه دي هتيجي امتي؟؟
وهل هتبقي نهايته ولا نهايتنا علي ايديه؟؟

وصلنا لدرجه ان في امتحان لطلبه في اولي ثانوي يحصل اللي احنا شايفينه في الصوره ده وكمان كان قبل الانتخابات يعني بالبلدي بيقولوا للعيال انه هو اللي هينجح والبلد بلدنا

وصلنا لدرجه ان في المسلسلات بينافقوه عيني عينك
كان اخرها في مسلسل العندليب
في مشهد من المشاهد ممثل بيقول للتاني اللي عامل دور السادات : قائد القوات الجوية الجديد عامل شغل كويس يا فندم
ومشهد تاني في المسلسل بعد حرب اكتوبر
بيقول : الفضل يرجع للقوات الجوية وقائدها اللي بذل مجهود عظيم يا فندم ( الفضل لله يا ولاد ال...) وخد كلام من ده كتير

ويا سلام بقي علي الجرايد المفروض انها قوميه - بس ازاي تبقي قوميه والنفاق موجود لازم تبقي حزبيه - كل شويه يطلع واحد يتحفنا بكتاباته العظيمه
كان اخرها مقاله قرأتها يوم السبت قبل الماضي في اخبار اليوم للسيد الممتاز: ممتاز القط
اما بدأت اقراها لقيته بيقول في اولها " كعادته الرئيس مبارك الذي يعمل دائما في صالح المواطن... " والله انا اول ماقريت السطر ده قفلت الجرنال وحلفت اني مش هقراها

بس طبعا لازم يقول كده
مش هوه ده مبارك اللي رفض ان معاش الضمان يتسمي باسمه في حين انه وافق ان مصر كلها تبقي باسمه " مصر مبارك ". واي مبني جديد لازم يكون باسمه وكان اخرهم موقف الترجمان بتاع السوبر جيت بعد اما اتجدد بقي اسمه " ميناء مبارك الدولي " ياااااااااااااااااااه

ونفس الصحف القوميه اللي احتفلت بمرور 25 سنه علي جلوسه علي العرش واصدرت بهذه المناسبه ملاحق كامله اكبر من الجرنان نفسه وقعدت تقارن مابين عصر الحريه والنهضه وبين السنين اللي قبلها ولا اكنهم بيكلموا ناس متخلفه

طيب بدل ما يقارنوا بين مصر 2006 ومصر 80 و82
كانوا يقارنوا بين مصر2006 ومصر 90 او92 اهو كان عدي عشر سنين علي حكمه
وفعلا لو قارنا بين مصر2006 ومصر90 هنلاقي مفيش اي حاجه اتغيرت

,الفرق الوحيد اننا في سنه 90 روحنا كاس العالم ( كتر خيرك... والله تعبينك معانا انت ماتستاهلش الشعب ده اللي مش عارف قيمتك انت تستاهل ناس احسن من دول بكتير... حد يحكم اكتر70مليون راس والله كتر خيرك....بالله عليك يا شيخ لتسيبهم دول مايعرفوش قيمتك....انا خايف علي صحتك ) لو عايزين يقارنوا فعلا يشوفوا دوله زي ماليزيا دي كانت فين سنه 82 وبقت فين سنه 2006



وياتري هتبقي فين في 2007 واحنا هنكون فين
احنا هنفضل ننافق في الملك وحاشيته والعالم كله بيتطور من حوالينا
والصوره اكبر دليل علي استمرار النفاق

ولسه في خراب كبير وفساد كتيييير
والريس لسه قدامه
كتييييييييييييييير

مفيش حاجة

دي قصيدة للشاعرة ايمان بكري , انا عرفتها بالصدفه لما شوفتها في برنامج القاهرة اليوم
وقولت لازم انشرها عشان فعلا شعرها رائع ومعبر جدا وبسيط جدا جدا
ودي واحده من روائعها بعنوان مفيش حاجة
وفعلا عندها حق مبقاش في حاجة..................بعد مااتنهبت
مانيش عايز خلاص حاجة
ولا محتاج انا لحاجة
ولو عايز صحيح حاجة
مخليتوليش ولا حاجة
عموماً بصوا فيه حاجة
هقولها بس محتاجه لعقول تفهم ولو حاجة
مهيش مفهومة او حاجة؟
نفسرها بكام حاجة
نوضحها بكام حاجة
(وأهى حاجة مع حاجة هتظهر وتبان لنا حاجة )
وانا ما بخفش من حاجة
مانيش مسنوده ولا حاجة
لكن ما بخفش من حاجة
لكن فرضاً لو هقول حاجة
هيحصل إيه؟ولا حاجة
هيعملوا إية؟ ولا حاجة
ولو بعد الشر .. بعد الشر لو واحد من القاعدين ..من السامعين..من الضالين ..فِهِم حاجة
هَيعملوا إيه ؟؟؟؟ اكيد برضُه ولا حاجة
فنتوكل على الستار لوجه الله نقول حاجة
فيه ناس بتعيش علشان حاجة
وناس بتموت علشان حاجة
وناس بتموت على الحاجة
وناس تديلك الحاجه وهى ليها محتاجه
وناس تديلك الحاجه و تاخد قصادها ميت حاجه
وناس تكبر تكون حاجه و ناس تصغر علشان حاجه
وناس منظر ومش حاجة
وتلقاه كبير..
حرس ونفير عليه منظر
وهو جبان وشيخ منصر ولا يبـنش عليه حاجة
كلامى يا خلق فيه حاجة ؟
لحد دلوقتى فيه حاجه؟
كلام عادى وبسيط جداً .. ولا فِهشِ ولا حاجة
ما انا ما أقدرش أقول حاجه
صحيح نفسى أقول حاجه وميت حاجه
لكن مش قادر اقول حاجة
لأنى لو هقول حاجه هييجى ناس بتوع حاجه وياخدونى ورا الحاجة
وهو لو سمع حاجه هيعملوهالى ميت حاجه
عموما بصو لو حد من القاعدين عايزنى أبلغه بحاجة
يقول مايخفش من حاجة
نعم ...... فيه إيه؟
لالالالالأ مافيش سرقه ولا تهليب ولا تهريب ولا حاجة
وبتقول إيه؟
مصمصوا إيه؟
وخصخصوا إيه؟
ده كله كلام مفيش حاجه
قضية إيه؟
ياشيخ روح خلاص مافيش حاجه
حرامى إيه؟ ولَكّح إيه؟وهرّب إيه؟
شــفـافـيـه... مافيش حاجة
وبتقول إيه ؟
لالالآلأ عـــيب لافيه تدليس ولاترقيص ولا تدبيس ولا حاجه
سمع مع هووووس انا حاسس انه فيه حاجة
دقيقة سكات لَتبقى حداد انا حاسه انه فيه حاجه
زمنكوا ياخلق فيه حاجه
ولازموا كام وميت حاجه
ده لو يعنى إذا كان فيه حاجة
انا عن نفسى مش حاسس ولا بحاجة ولا متضايقه ولا حاجة
سعادتك برضه مش زَيـىِ مافيش حاجة ؟
أهـه بيقول مافيش حاجة جنابك برضه مش زَيـىِ وعلشان زَيـىِ مافيش حاجة ؟
أهـه بيضحك بيقول مافيش حاجة
ما أنا قولتلكو من الأول مافيش حاجة
عليا النعمه يا اخوانّا مافيه حاجة
ورحمة ابويا ويّا أبوك على إللّى جابوك ما فيه حاجه
وعهد الله . وعهد الله. وعهد الله ما خللولنا ولا حاجه
بقولك إيه خـــلاص خلّص وفركش يالا يا اخوان امفيش حاجه

Thursday, January 25, 2007

امبارح.....كان عمري عشرين, ولسه زي منا

من كام يوم كده وانا بحتفل بعيد ميلادي قعدت افكر... انا عدي من عمري عشرين سنه بحالهم
وحاولت افتكر كده ايه اللي انا عملته من ساعه اما وعيت ع الدنيا
ياتري عملت ايه لبلدي ,عملت ايه لنفسي ,وقبل ده كله عملت ايه لأخرتي .ايه اللي انا عملته عشان يوم لما اقف قدام المولي عز وجل .وفي سؤال مهم جه علي بالي
ياتري هعيش قد اللي انا عشته اوحتي نص اللي عشته او حتي ربعه او كمان لحظات عشان احاول اعمل اي حاجه مفيده ومهمه
ياريت الواحد يفوق ويحاول يعمل اي حاجه تنفعه لاخرته ,
وتنفع بلده ,
وتنفعه هوه في حياته لو ربنا اداله العمر