من أسبوع تقريبا وانا نازل الصبح رايح قصر العيني قابلت اسلام واحمد وحازم وعلاء وكان معاهم العربية وخارجين
سالوني رايح فين قلتلهم رايح قصر العيني قالولي خلاص تعالي معانا وننزلك في سكتنا واحنا رايحين الجامعة ( كلهم في جامعه القاهرة ماعدا حازم في مودرن اكاديمي ) وسالتة وانت يا حازم مش رايح الجامعة؟؟ قالي لأ انا ماليش نفس اروح ورايح مع احمد جامعته
المهم ركبت معاهم
اسلام كان سايق وانا قاعد جنبه واحمد وحازم وعلاء قعدوا ورا
بعد اما مشينا شوية كده لقيت احمد قام جايب كوباية من تحت الكرسي ومطلع من جيبه خابور حشيش (قرش كابتشينو.....سيم اهه عشان محدش يفهم) والاقيه هو وحازم قاعدين بيضربوا في العربية وفي وسط الشارع ولا هاممهم حاجه واستغربت جدا لاني اول مره اشوف حازم وهو بيعمل كده لكن احمد عادي طول عمره مسطول اللي يضحك ان احمد كان هيعدي ع المحكمة الاول قبل مايروح الكلية وفعلا راح المحكمة وهو مسطوووووول ودخل للقاضي وهو عامل دماغ
المهم...نزلت انا ورحت مشواري بس وانا راجع بقي قعدت افتكر الموقف ده وجه علي بالي سؤال غريب جدا وهو ده السؤال اللي بسببه بكتب الموضوع ونفسي حد يقولي اجابه مقنعه
ليه لو في ناس قاعدين بيشربوا خمور اوبيرة او...الخ محدش يقدر يكلمهم , في حين لو كانوا قاعدين بيشربوا حشيش او مخدرات او...بيتقبض عليهم !!؟؟
وفضلت افكر في الموضوع وادور علي اي اجابة بس مالقيتش
واقول لنفسي الخمرة والبيرة حرام...بس برضه الحشيش والبانجو حرام
الخمرة والبيرة بيسطلوا ويذهبوا العقل...بس برضه الحشيش والبانجو بيسطلوا ويذهبوا العقل
طيب في ايه بقي اشمعني ده ممنوع (قانونا) ... وده مسموح به ومصرح واحيانا الحكومة هي اللي بتستورده ؟؟
وفضلت في حيرتي كده وانا مش لاقي اجابة وقلت خلاص انا لازم اخلي ناس تشاركني في حيرتي
سالت ناس كتير جدا ..الغالبية منهم قالولي مش عارفين..وناس قالولي تصدق اول مرة ناخد بالنا م الموضوع ده وقالولي لو عرفت اجابة للسؤال ده لازم ابقي اقولها ليهم
بس اطرف اجابه لقيتها لما سالت واحد من اصحابي قالي : اصل البيرة بتغسل الكليه وطبعا عشان حكومتنا قلبها ع المواطن وصحته منعت الحشيش وسمحت بالبيرة............ (كلام كبير اوي )؟
وللا لما سالت حازم (مش حازم انا..ده اعز اصحابي وعندي في البيت بيقولوا عليه انه خطيبتي مع اني عايز اخطب واحده شبه غاده عادل ...بس امري لله كله قسمه ونصيب ) قالي يابني الكلام ده كان زمان لكن دلوقتي الحشيش بيتوزع مع العيش وبقي موجود اكتر من اللب وادينا كنا بنشرب واحنا في العربية وعدينا من قدام القسم وعلي اكتر من لجنه بس ولا حد كلمنا ولا حد قالنا انتوا بتعملوا ايه ..يابني احمد دخل قابل القاضي وهو مسطول في اكتر من كده مسخره...شكلهم كده وافقوا علي تجارته بعد اما وافقوا ع التعديلات الدستورية؟؟
اما راي حازم المتواضع ( ده بقي حازم انا ) وعلي اعتبار اني راجل بتاع فيزيا ف انا اري ان الحكومة المصرية قامت ببعض الابحاث عن ثقب الاوزون ووجدت ان السبب في هذا الخرم هو دخان الحشيش المتصاعد بكثره في يوم الحشيش العالمي ( الوقفه سابقا ) اللي بتكون فيه مصر كلها خربااااااااااااااااااااااااااااااااااااااااااااانه
ونظرا لحرص الحكومة المصرية علي البحث العلمي وصحه الناس في كل انحاء الدنيا فقد ارتئت الحكومة تجريم البيع والاتجار في الحشيش والسماح ببيع الخمور والبيرة .............لأنها بتغسل الكلي
ولكن يظل هذا السؤال بلا اجابة مقنعه
ياريت تشاركوا معانا في مسابقتنا عشان تكسبوا جوايزنا القيمه
اتصل الان علي زيرو تعديلات دستورية زيرو وزارة الداخلية...اتصل لتربح احدي الجوائز التالية
الجايزة التالتة : امر بالاعتقال لمده لا تزيد عن خمس سنوات ولا تقل عن ثلاث سنوات
الجايزة التانية : امر بالاعتقال لمده لا تقل عن عشر سنوات مع التعذيب (انت واللي جابوك لحد اما يبانلك صاحب) بس ممكن تزيد عن 10 في حاله الاجابة النموذجية
اما جايزتنا الكبري : فهي ارسالك في بعثه علميه - تضم نخبه من اكبرالعلماء المعارضين للنظام - الي الشمس لقياس درجه حرارتها والعوده الي المحروسه واطلاعنا علي نتائج ابحاثكم في هذا المجال.....(ده لو رجعت اصلا وحتي لورجعت هما مش هيسيبوك)..فخليك هناك ارحم
كل ماتتصل اكتر فرصتك في الفوز تكتر.....اتصل الان
8 comments:
سيبك من السؤال
انت عايز تعرف اجابة السؤال اوى كده و مش مركز ان اصحابك بيعملوا كده
يا حاااااااااازم
ازاى كده
انا بصراحه حسيت ان الموضوع مش موضوع الدوله بتمنع ايه و تسمح بايه
المشكله هى ان الحلويين الشباب الامامير مش قادرين يفرقوا بين الصح و الغلط و الحرام و الحلال
للأسف
يبقلا اجابة السؤال مش مهمه
لأ طبعا اجابة السؤال مهمه ومهمه جدا كمان
لان احنا المفروض اننا دوله اسلاميه والماده التانية من الدستور بتقول
الإسلام دين الدولة، واللغة العربية لغتها الرسمية، ومبادئ الشريعة الإسلامية المصدر الرئيسي للتشريع
ومادام الخمور حرام يبقي لازم تتمنع0والا بكده يبقي احنا بنخالف ديننا اولا والدستور ثانيا
يبقي السؤال لازم له اجابه ولا لأ ؟؟؟
ومين قالك انهم مش قادرين يفرقوا بين الصح والغلط والحلال والحرام
طيب م احنا قدامنا حاجات كتير حرام وغلط واحنا عارفين انها كده بس للاسف بنعملها
وبعدين دي مش مشكلة صحابي لوحدهم دي مشكلة جيل بحاله
ولا حتي جيل دي مشكلة امة باكملها
وهي للاسف حرب وقدرت الخنازير انها تكسبها وللاسف احنا بنساعدهم علي كده
بس ان شاء الله تبقي جوله واحده بس ليهم
والحرب احنا اللي نكسبها
يعنى يا حازم لو الدوله اصدرت قرار انها حرام الناس مش هايشربوها
لا هايشربوها لأنها سلوك افراد و الافراد هما اللى بيمثلوا المجتمع و طالما افراده طريقهم غلك يبقى كل حاجه هاتبقى غلط
مش القوانين بتاعة المنع هى الحل
الناس لو عندها اراده و عارفه دينها هاتبطل لوحدها و على فكره انت مش من حقك تطلب منع حاجه زى دى مع انى مقتنعه تماما انها غلط و حرام لكن انت لازم تعيش ف سلام مع الناس اللى حواليك و تحترك ديانتهم طالما هما لم يعتدوا على دينك و لعلمك معظم الناس اللى بتشرب الحاجات دى للأسف الشديد مسلمين يعنى المفروض يمتنعوا عنها لان اسلامهم حرمها تحريم كامل
مش بقولك ....ده سلوك افراد بيمثلوا المجتمع و مش القوانين هى اللى هاتوقفهم
طيب ما القانون بيمنع السرقه
هل الحراميه امتنعوا عنها
القانون بيمنع القتل
هل الناس امتنعت عن القتل و الاجرام
لا ...الاجابه هى لا لم يمتنعوا
ليه تانى
لأن ده سلوك و لو الناس سلوكها نفسه متغيرش ما فيش اى قانون هايقدر يوقفهم
هو كل حاجه غلط في بلدنا بقت سلوك افراد
يعني الواد اللي دراعاته اتحرقت من عمود كهربا ده ... سلوك افراد
وبعدين خليني معاكي ونقول انه سوك افراد
لما يبقي مسموح بيها احسن ولا لما تبقي ممنوعه علي الاقل اللي بيشربها هيبقي خايف وهو بيشربها
وبعدين احنا شعب اتعود ع الكرباج
لازم رخصتنا تتسحب عشان نمشي صح
لازم ناخد فوق دماغنا عشان نمشي مظبوط
ف مش معقول هاجي لواحد مدمن خمور وقوله ان اللي هو بيعمله ده غلط
لكن لو اتقبض عليه مره هيعرف ان الله حق ومش هيكررها تاني
بالنسبه بقي للناس التانين انا طبعا احترم ديانتهم لكن انا دوله اسلاااااااميه
ومادام في حاجه عندهم هتضرني في ديني وهتعملي فتنه بين المسلمين يبقي لازم امنعها او علي الاقل اسمح بيها ليهم هما بس انا
ازيك يا حازم
معلش مدخلتش الصبح اصل كان ورايا كذا حاجة
المهم
بص يا سيدي
الموضوع بسيط جدا جدا
اولا المخدرات محرمة وممنوعة قانونا .....لان مفيش اي دولة في العالم ولا اي قانون في العالم بيقول ان
المخدرات حلال او مشروعة
فبالتالي مصر متقدرشي تخالفهم
انما الخمرة اللي هي الويسكي...اللي هي الفوديكا ارلوسي..اللي هي النبيذ اللي هي المشروبات الروحية
محرمة في الاسلام....بس
انما عند اهل الكفر دي مشروب عادي...زي الشاي عندنا
..طبعا مصر متقدرشي تزعل حبايبها منها....حتى ولو كان على حساب نبذ الشريعة....وطرح ما جاء بالشريعة ارضا
من تحريم الخمر او كده
انت بتقول فيها
روح بس انت مطار القاهرة الدولي
وهتلاقي محلات الخمر هناك
وربنا يعافينا
اظن السبب وضح يا اخي
بس ليا عتاب عليك
وهو انك لم تأمر بالمعروف ولم تنه عن المنكر...لما اصحابك شربوا حشيش
يا اخي....قال رسول الله-ص-
المرء على دين خليله....فلينظر أحدكم من يخالل
محبك في الله/خالد
اخي الكريم د.خالد
متشكر جدا علي اجابة سؤالي
وربما تكون الاكثر اقناعا لي
اما بالنسبة لاصحابي انا فعلا
امرتهم بالمعروف وهم وعدوني انهم هيبطلوا......بس افلح ان صدق
بس انت ادعيلي وادعيلهم ربنا يهدينا كلنا
الحمد لله يا اخونا حازم
ولا تطول الغياب
عشان البيره والخمور للسياحه اللي بدخلنا فلوس حكومه بنت هرمه بقي وعارفه القرش يجي ازاي لكن الحشيش الاجانب مالهمش في الدماغ المصري
تحياتي
Post a Comment